Sunday , September 22 2019

आहा ! रुप्से, फेरि भेटौंला !!

मुस्ताङ घुमिवरी फर्केर आउँदा मन चञ्चल थियो, रुप्से हेर्न पाइने भएर । रुप्से पुगेपछि गाडी रोक्यो भने झरेर हेर्ने तर छँदै छ, रोकेन भने पनि बसको झ्यालबाटै हेर्ने अवसर थियो, किनभने हामी रुप्सेकै साइडमा थियो ।

  • बसन्त महर्जन

रुप्से, सुनेको मात्र । उल्लेखनीय झरनाहरुमध्ये एक । देख्न त देखेको तर तस्वीर र भिडियो क्लिप्समा मात्र । पोखराबाट ११० किलोमिटर टाढाको यो झरना म्याग्दी जिल्लाको बेनी भएर मुस्ताङ जाँदा बाटोमै पर्छ, जोमसोमभन्दा करीब ४० किलोमिटर वरै । मुस्ताङ त गएको तर हिडेर होइन, गुडेर पनि होइन, हवाइजहाजबाट । यही भएर रुप्सेको दर्शनबाट बन्चित हुनुपरिरहेको थियो ।

यस पाली बेनी भएर मुस्ताङ जाने कार्यक्रम बन्यो । बाटोमा अरु पनि थुप्रै कुरा देख्न पाइने भएर अलि उत्साहित पनि थिएँ । रुप्सेकै कुरामा बढी उत्साहित थिएँ । दिउँसो ४ बजेतिर बेनी पुगेका थियौं अर्थात् भोलि बिहान माथि लाग्ने योजना थियो । भोलिको लागि बस टिकट काट्न टिकट काउन्टरमा पुग्दा थाहा भयो, उही दिन ५ बजे एउटा गाडी माथि जाँदै रहेछ । यो गाडी मुस्ताङसम्म नै पुग्ने नभएर केही घन्टा माथि मात्रै । त्यहाँ बीच बाटोमा वास बस्ने र भोलि विहानै अर्को गाडि चढेर माथि लाग्दा विहान आठ बजेतिरै जोमसोम पुगिने । समयको बचावट हुने र मुस्ताङमा बढी समय बिताउन पाउनु राम्रै हो । अनि रुप्से ? रुप्से पुग्दा त उज्यालो भइसक्ने रैछ । के खोज्छन् कानो ? भनेजस्तै भयो । अरु के चाहियो र ?

हामी दानामा वास बसेका थियौं । गाडी आइपुग्ने र चढ्नु पर्ने भनिएकोले त्यही अनुसार तयार भई विहान चार बजे नै  सबै तयारी गरी गाडी कुर्न होटेल बाहिर आइसकेका थियौं तर गाडीहरू चढ्न पाएका थिएनौं ।गाडी त आउने तर नरोक्ने वा चढ्न नपाउने । त्यसै त चिसोको समय, उसमाथि विहानको चिसो । पर्खदा पर्खदा उज्यालो नै भयो । तर पनि कुनै गाडी चढ्न पाएको होइन । सामान बोकेर आएको एउटा ट्रकलाई अनुरोध गरेर बल्ल गाडी चढ्न पायौं ।  उज्यालिन थालिसकेको तर गाडी यात्रालाई अगाडि बढाउन नपाएकाले अलि अत्यास पनि भइसकेको थियो । जे होस्, ट्रक नै सही, अगाडि बढ्न पायौं ।

रुप्से कहिले आउँछ, अझ कति टाढा पर्छ भन्ने प्रश्नले ट्रकमा भएकालाई दिक्क पनि लाग्यो होला । रुप्से आउन नै लाग्यो भनेपछि अलि उत्साहित भएँ । आयो पनि । बाटो छेवैमा रहेछ, दायाँतिर । बायाँ काली गण्डकी बगिरहेकी छिन् । आफ्नो नीजि गाडीमा आएकाहरू एक छेउमा रोकेर रुप्सेलाई नियालीरहेका थिए । कोही रुप्सेलाई पृष्ठभूमि बनाएर फोटो खिचिरहेका । ट्रकको अगाडि बसेर गएका कारण रुप्सेलाई सम्पूर्ण रुपमा देख्न पनि पाएका थिएनौं । ट्रक एक छिन रोकिदिएको भए हुन्थ्यो नि, तर रोक्ने छाँटकाटै थिएन । अनुरोध गर्न अवस्था पनि थिएन किनभने बल्लबल्ल चढ्न पाएको । तर चित्त बुझायौं, यही बाटो फर्केर आउने त हो, त्यही बेला हेरौंला ।

मुस्ताङ घुमिवरी फर्केर आउँदा मन चञ्चल थियो, रुप्से हेर्न पाइने भएर । रुप्से पुगेपछि गाडी रोक्यो भने झरेर हेर्ने तर छँदै छ, रोकेन भने पनि बसको झ्यालबाटै हेर्ने अवसर थियो, किनभने हामी रुप्सेकै साइडमा थियो ।

रुप्से जसै नजिक आइपुग्यो, रुप्सेमा भिजेर आएका यात्रुहरू देख्यौं । गाडी रोकेर रुप्से हेर्ने र त्यसमा खेल्नेहरूको भीड नै लाग्दो रहेछ । फोटो खिच्नेहरूको संख्या पनि कम्तीको थिएन । सार्वजनिक यातायातहरू यहाँ रोक्दै नरोक्ने रहेछ । तर रुप्सेको सर्वाङ्ग मात्रै देखेनौं, आफ्नो क्यामेराले भ्यायौं पनि । ९८४ फीट (३०० मीटर) अग्लो यो झरना जब रुप्से कट्यो, झरनामा रुझेको जस्तै अनुभव भयो । तर पनि धित मरेको छैन । रुप्सेलाई छुन पाएन, त्यसमा रुझ्न पाएन । रुप्सेलाई पृष्ठभूमि बनाएर फोटो पनि खिच्न पाएन । तर के भयो र ? फेरि आउने अवसर त छँदै छ । फेरि आउने संकल्प ग¥यौं र भन्यौं, ‘फेरि भेटौंला रुप्से !’

About Basanta Maharjan

Basanta Maharjan, author and researcher, has expertised in Nepalese history, culture, archaeology and Buddhist study. Seven of books and number of articles on Buddhist Study have been authorised by him. He has mastered in Buddhist study and is a gold medalist from Tribhuvan University. As well as, he has mastered in Nepalese history, culture and archaeology also from same university. Currently he has been involved in research work and lectures on own subject. mail : maharjan_basanta@yahoo.com

Check Also

नेपालमै छ तिब्बत पनि

पर्यटकीय आकर्षणको केन्द्र रहिआएका नेपालका हिमाली क्षेत्रहरूलाई अझ व्यापक बनाउन तिब्बतको विगतसँग जोड्न सकिन्छ। बसन्त …

भिस्वा स्तूपः वीरगंजलाई अवसर

लुम्बिनीबाट ‘बुद्धिस्ट सर्किट’ को यात्रा शुरू गरेर भारतका विभिन्न बौद्ध स्थलहरू घुमाई भिस्वा स्तूप दर्शनको …

Leave a Reply

Your email address will not be published. Required fields are marked *